Wala ginpahanugutan sang Senado ang request ni Senator Ronald “Bato” dela Rosa nga magamit sang iya pamilya ang Senate Mansion sa Baguio City.
Sa sulat kay Senate President Tito Sotto kahapon, Marso 12, ginpangayo ni dela Rosa nga tugutan ang iya pamilya nga mag-istar anay sa Senate Mansion para sa Chief of Staff of the Armed Forces of the Philippines ukon CSAFP Cup 2026 shooting competition sa Marso 26 tubtob 29.
Suno naman kay Mark Llandro Mendoza, Senate Secretary, sandig sa patakaran, kinahanglan nga upod mismo ang senador kun may magamit sang Senate Mansion. Dugang pa niya, ginapaidalom man subong sa renovation ang amo nga mansion.
“The Senate mansion is undergoing repairs now and the policy is the family must be accompanied by the senator,” suno kay Mendoza.
Nahibaluan nga hiwaton ang CSAFP Cup 2026 sa Philippine Military Academy (PMA) firing range sa Fort Del Pilar, Baguio City.
Missing in action si Dela Rosa halin sang Nobyembre 2025.
Nag-umpisa ini matapos gin-anunsyo ni Ombudsman Jesus Crispin “Boying” Remulla nga nakit-an na sini ang ginaalegar kopya sang alleged warrant of arrest halin sa International Criminal Court (ICC) batok kay Dela Rosa.
Ginhingadlan ang amo nga senador (nga former PNP chief) bilang alleged co-conspirator sa crimes against humanity case nga ginapangatubang ni former President Rodrigo Duterte.
Apisar nga wala ginkumpirma sang ICC kun ano ka matuod ang claim ni Remulla, wala na nagpakita si Dela Rosa sa tanan nga official activities, hearings, kag sessions sang Senado apisar nga nagabaton gihapon ini sang iya nga sweldo.#
