Nagtanyag ang United States Department of State sang $10 million ukon P595.9-million nga reward sa kun sin-o man ang makahatag sang impormasyon kaangot kay Supreme Leader Ayatollah Mojtaba Khamenei kag iban pa nga mga matag-as nga opisyal sang Iran.
Gintawag sang State Department nga “Rewards for Justice” ang amo nga pograma nga nagatuyo nga matultulan ang Iranian officials.
Yara man sa listahan sanday Iranian Interior Minister Eskandar Momeni kag Minister of Intelligence and Security Esmail Khatib.
“These individuals command and direct various elements of Iran’s Islamic Revolutionary Guard Corps (IRGC), which plans, organises and executes terrorism around the world,” suno sa ahensya.
Pananglitan may yara sang impormasyon suno sa ahensya, mahimo ini mapadala via Tor ukon Signal agud nga mangin eligible para sa reward.
Si Mojtaba amo ang bag-o nga Supreme Leader sang Islamic Republic matapos napatay ang anay lider sang pungsod nga amo ang iya amay nga Ali Khamenei sang nag-atake ang US kag Israel sang Pebrero 28.
Una na nagguwa ang reports nga napilasan man kag na-coma si Mojtaba sa gyera apang wala pa sang opisyal nga kumpirmasyon halin sa Tehran.
Sang nagligad nga adlaw, ginbasa sa Iranian state media ang iya mensahe — wala sang audio kag wala sang video nga nagapakita sang itsura ni Mojtaba. Nagpasalig sini nga itimalos nila ang tanan nga Iranians nga nagkalamatay sa pagpamomba sang US kag Israel Defense Forces.#
