Nagpanawagan si Vice President Sara Duterte sang world peace kadungan sang selebrasyon sang Eid’l Fitr.
Sa iya mensahe subong nga adlaw, ginpalab-ot sini ang iya panamyaw sa mga Filipino Muslims, mga Overseas Filipino Workers sa Middle East kag Muslims sa bilog nga kalibutan.
Suno kay Duterte, ginakilala gid niya ang sakripisyo, disiplina kag debosyon sang mga Muslim sa ila tradisyon lakip na ang ila pagpu-asa sa sulod sang isa ka bulan.
Kabahin sang iya mensahe amo ang pangamuyo para sa kahilwayan sang bilog nga kalibutan ilabi na subong, nga nagapdayun pa sa gihapon ang tension sa Middle East nga amo ang rehiyon nga isa sa may pinakadako nga Muslim community.
Madumduman nga gin-anunsyo sang Bangsamoro Grand Mufti nga iselebrar bwas nga adlaw, Marso 21, ang Eid’l Fitr.
Ini matapos ang ginpatigayon nga moon sighting activities sa Bangsamoro Autonomous Region in Muslim Mindanao kag sa iban pa nga designated areas sa Pilipinas kun sa diin wala sang crescent moon nga nakit-an kagab-i nga importante gid nga simbolo sa mga muslims agud nga matumod kun san-o magasugod ang bag-o nga bulan para sa ila.
