Iga-deploy ang mga pulis sa mga pilgrimage sites sa probinsya sang Iloilo kun sa diin linibo ka mga tumuluo ang ginaantisipar nga magakadto kadungan sang Semana Santa.
Sa interview sang Bombo Radyo kay Police Lt. Colonel Rolando Araño, spokesperson sang Iloilo Police Provincial Office (IPPO), iya ginpahayag nga magluwas sa mga personnel halin sa municipal police stations, may yara man sang iga-augment nga dugang nga pwersa halin sa mobile force companies.
Lakip sa ginadugukan sa Holy Week kada tuig sa Iloilo amo ang Taltal sa Barotac Viejo kag ang Agony Hill sa Alimodian nga ginakadtuan naman para sa Stations of the Cross.
Suno pa kay Araño, may ipalapta man nga mga pulis sa mga lugar kun sa diin nagatingob ang madamo nga mga tawo kaangay sang mga pantalan, terminal, simbahan, kag iban pa.
May yara man sang ipadala nga mga covert kag police assistance desk personnel.
Sa masunod nga inadlaw suno sa IPPO, natalana na nga ipadalom sa heightened alert status ang talatapan.
Ginpahanumdom man sa mga pumuluyo, ilabi na sa mga may plano nga magbiya anay sa ila nga mga balay, nga mag-doble halong gid ilabi na nga ginakuha sang mga kriminal ini nga oportunidad agud nga makapang-hingalit kag makapangawat.#
