Nagmando si President Ferdinand Marcos Jr. nga i-recalibrate ang preparasyon sang Pilipinas para sa ASEAN 2026 agud nga makakinot kag magatutok lamang sa mas importante nga mga isyu.
Suno sa presidente, bilang kabahin nga tikang, ila na lang patigayunon online ang ginabulubanta nga 650 ka preparatory meetings.
Lakip diri ang mga meeting sang working groups, senior officials, kag ministerial level.
Ginkumpirmar man niya nga himuon nga simple ang Leaders’ Summit sa Mayo, nga maga-focus sa mga kinahanglan nga tutukan nga isyu kaangay sang energy security, mga pagkaon, kag kaayuhan sang migrant workers.
Nagpagwa na sang memorandum ang gobyerno agud ipatuman ini nga mga pagbag-o, lakip na ang paghiwat sang diplomatic briefings sang Department of Foreign Affairs.
Suno naman kay Executive Secretary Ralph Recto, katuyuan sini nga tikang nga mapabakod ang pagbinuligay sang Southeast Asian nations kag makahimo sang konkreto nga sabat sa mga nagakatabo nga global challenges, ilabi na subong ang ginapangatubang nga krisis sa Middle East.
Ginapaabot man nga magapatigayon ang gobyerno sang dugang nga pagkinot kag mahatag ang pondo sa mga programa nga magabulig sa mga pumuluyo nga apektado sang global oil crisis.
Ginpabutyag sang gobyerno nga mas importante subong ang madali kag praktikal nga solusyon kag indi ang engrande nga seremonya.
