Posible nga magpasaka sang presyo sang ila ginabaligya nga pagkaon ang mga nagapanag-iya sang karinderya sa Iloilo City bangud sa posible nga pagsaka man sa presyo sang Liquified Petroleum Gas (LPG) sa masunod nga bulan.
Sa interview sang Bombo Radyo kay Frozzy Magbanua, nagapanag-iya sang karinderya sa City Proper, iya ginpahayag nga magadugang sila sang P2 tubtob P5 kun matigayon nga mapasaka ang presyo sang LPG.
Suno sa iya, ila man ginakonsiderar nga buhinan nalang ang serving sang ila ginabaligya nga sud-an kag ipabilin ang ila presyo agud indi man matam-an ang mga estudyante nga masami nga nagabakal sa ila.
Dugang pa ni Magbanua, indi lang ang presyo sang LPG ang ila ginaproblema bangud nagmahal man ang bugas, mantika kag iban pa nga ila gid ginagamit sa ila nga negosyo.
