Patay ang duwa ka pulis kag isa ka empleyado sang Bureau of Corrections (BuCor), matapos nga matiruhan sa Barangay Irawan sa Puerto Princesa City, Palawan, gab-i sang Byernes Santo, Abril 3, 2026.
Suno sa nakakita nga residente sa lugar, may ara sang komprontasyon nga natabo sa tunga sang mga pulis kag pila ka mga tambay sa lugar pasado 9:40 sang gab-i.
Naghalin ang mga pulis sa lugar apang sang nagbalik ang mga ini may dala na nga mga back-up nga nagresulta sa panibag-o nga komprontasyon sa tunga sang mga ini kun sa diin may ara na sang pagbinaslanay sang lupok.
Ginkilala ang mga napatay nga sanday Police Staff Sergeants Ryan Cris Cabaña kag Jayson Fernandez, nga pareho nga na-assign sa Puerto Princesa City Police Station 2, kag si Jerson Ojario Talon sang BuCor.
Ginmanduan na ni Puerto Princesa City Police Office (PPCPO) Director Police Colonel Cristine Tabdi sang ma-id-id nga imbestigasyon ang krimen.
Naglunsyar naman ang mga ini sang manhunt operation agud mahibaluan kag maaresto ang mga suspek.
Dugang pa diri nagmandu man ang Police Director sang pagsugod sang case buildup kag estrikto nga operasyon.
