Presyo sang diesel, may rollback nga P20.89/L subong nga semana —Marcos

Gin-anunsyo ni President Ferdinand “Bongbong” Marcos Jr. ang rollback sa presyo sang produktong petrolyo subong nga semana.

Kumpirmasyon ini sa nangin una nga pahayag sang Department of Energy (DOE) nga may pagnubo na gid man sa presyo sa labing-una nga tion halin sang nagsugod ang gyera sa Middle East.

Yari ang rollback suno kay Marcos:

Diesel – P20.89/L
Gasoline – P4.43/L
Kerosene – P8.50/L

Suno kay Marcos, daku na ini nga bulig sa mga driver, commuter, kag tagsa ka pamilya nga Pilipino nga apektado sang mataas nga presyo sang krudo.

Gin-ako man sang presidente nga bisan daku ini nga bulig, indi ini bastante, gani tayuyon suno sa iya ang bulig sang gobyerno tubtub nga wala napanubo ang gasto sa byahe, pagkaon, kag sa pangkabug-usan nga pagpangabuhi.

Nagpasalig si Marcos nga sa masunod nga sinemana kag inadlaw, may iga-anunsyo pa siya kaangot sa mga masunod nga tikang sang gobyerno.

“Hindi natin hahayaang mapabayaan ang bawat Pilipino sa gitna ng mga hamong ito, kaya tuloy-tuloy ang trabaho ng pamahalaan para siguradong may mararamdaman na ginhawa ang bawat pamilya,” suno sa presidente.

DESISYON SA EXCISE TAX

Balantayan man subong nga adlaw ang posible nga paggwa sang desisyon ni Marcos kaangot sa excise tax sa produktong petrolyo.

Ginpahayag ni Palace press officer Undersecretary Claire Castro ini nga petsa matapos ginkwestyon sang mga kritiko kun i-suspend pa bala ukon buhinan ni Marcos ang buwis agud mabuligan man ang tanan.

Sang nagligad nga semana, nagsapol ang presidente sa Cabinet officials agud nga diskusyunan ang mga intervention sa tunga sang epekto sang gyera sa Middle East.#