Makaigu pa sa 50 ka adlaw ang suplay sang liquified petroleum gas (LPG) nga yari subong sa Pilipinas.
Ginpahayag ini sang Department of Energy (DOE) matapos nag-abot ang imports sang cooking gas.
Antes sini, nahangawa liwat ang industriya bangud nagnubo ang suplay sini nga semana nga makaigu na lamang sa 36 ka adlaw.
Luwas sa LPG, makaigu pa ang kerosene sa 105 ka adlaw; ang gasolina sa 57 ka adlaw; kag ang diesel sa 49 ka adlaw, suno sa data sang DOE.
Maayo pa ini nga supply level suno kay DOE Secretary Sharon Garin, apang maga-depende pa kun ano ang matabo sa Strait of Hormuz kag kun ano ang availability sa iban nga mga pungsod.
Ginahikot man sang ahensya ang long-term solutions kaangay sang pagpadasig sang solar rooftop systems kag net metering agud mabuhinan ang pagsalig sa langis.
Ginpaathag man ni Garin nga ang paglain-lain sa presyo sang produktong petrolyo ang nakadepende sa tensyon sa Middle East.
Indi mahambal subong kun magapadayon ang rollback, ilabi na bangud nakadepende ini suno sa iya sa ginapanghambal ni Trump kag ang balos sang Iran.
Natigayon ang rollback subong nga semana bangud may duha ka semana nga ceasefire ang US kag Iran, apang nagtaas liwat ang global prices matapos ginmandu ni Trump ang pagbalabag sa Strait of Hormuz bangud napaslawan ang ila peace talks sa Pakistan.
 nga yari subong sa Pilipinas suno sa data sang DOE.){kind=link}