Ginsabat ni House Committee on Justice chairperson Rep. Gerville Luistro sa iya opening remarks sa hearing sang panel ang mga ginapatu-pato sa ila sang mga supporters ni Vice President Sara Duterte.
Ang una sini gin-address amo ang mga akusasyon nga naga-conduct na sang trial ang Kamara nga lapaw sa ila hurisdiksyon bangud papel ini sang Senado kun impeachment ang pagahambalan.
Sa iya speech, ginklaro ni Luistro nga naga-initiate ang Kamara bangud amo ini ang ila katungdanan sa idalom sang Kontitusyon.
Pahayag pa sini, diri nga stage ila lantawon kun bala may bastante nga ebidensya ukon kun may probable cause bala para nga mapasaka sa upper chamber ang impeachment complaints.
“Malinaw sa atin na hindi natin inaagaw ang kapangyarihan ng Senado na magpasya kung guilty o not guilty ang opisyal,” suno kay Luistro.
“We have the exclusive power to impeach,” suno sa iya, nga buot silingon, “Sa Kamara nagsisimula ang impeachment process. Sa atin ang unang galaw. Sa atin ang direksyon. At gaya ng sabi ng mga kabataan, ‘hawak natin ang beat’.”
MAY KRISIS, PERO MAY IMPEACHMENT?
Ginsabat man ni Luistro ang mga pamangkot kun ngaa gina-una nila ang impeachment bisan nga may mga mas importante nga problema ang pungsod.
Husto man suno kay Luistro nga sampaw-sampaw ang gina-atubang nga problema sa Pilipinas lakip na ang krisis kag kurapsyon, apang ang iya pamangkot sa mga kritiko: “Does the existence of many problems mean we should ignore one specific problem?”
Pahayag sang kongresista, mahimo gid matungdan sang committee ang ila papel sa idalom sang Konstitusyon, samtang nagahulag naman ang gobyerno agud ma-address ang iban nga mga problema.
“Multitasking ang ating gobyerno,” pahayag pa sini.
Ginpalabtikan man sini ang pag-absent ni Duterte sa hearing sang Kamara.
Nahibaluan nga apat na ka mga petisyon ang gin-file sang kampo sang vice president agud nga pauntaton ang proceedings sang panel.#
