Ginkumpirma sang National Bureau of Investigation (NBI) nga authentic kag indi produkto sang artificial intelligence ang naglapta nga “kill threat” video ni Vice President Sara Duterte batok kanday Pres. Ferdinand Marcos Jr., First Lady Liza Araneta-Marcos, kag anay House Speaker Martin Romualdez.
Sa hearing sang House Committee on Justice, ginsiling ni NBI Agent John Mark Calilung nga nagpaidalom sa maid-id nga pag-eksamin ang nasambit nga video sa idalom sang Affidavit of Authentication of Digital Evidence.
Ang video ang ginhimo sang Nobyembre 23, 2024, kadungan sang pagka-detain sang chief of staff sang bise presidente nga si Zuleika Lopez matapos ma-contempt sa Kamara de Representantes.
Liwat nga ginpagwa ang video sa impeachment proceedings, kun sa diin nabatian kag makit-an si Duterte nga nagbuyayaw kag nagpamahog sa nasambit nga mga opisyal.
Suno pa kay Calilung, nakig-angot ang NBI sa Meta agud mapreserba ang orihinal nga kopya sang video, kalakip ang URL, screen recording sang livestream, kag hash value computation—isa ka digital “fingerprint” nga nagabag-o kun na-edit ang file.
Samtang, ginsiling ni NBI Director Melvin Matibag nga padayon ang ila nga imbestigasyon agud matumod ang indibidwal nga ginkontrata sang bise presidente nga patyon si Marcos, First Lady Liza, kag Romualdez.
Dugang niya, kalakip sa mga ginambestigaran ang pila ka indibidwal nga may malapit nga kaangtanan sa bise presidente, kalakip ang mga myembro kag anay myembro sang Vice Presidential Security and Protection Group (VPSPG).
 nga authentic ang “kill threat” video ni Vice President Sara Duterte vs Presidente Marcos, Liza Marcos, Martin Romualdez){kind=link}