Ginsundan sang tatlo ka Chinese Coast Guard Vessel ang barko sang Philippine Coast Guard samtang nagapadulong ini sa Pag-asa Island para sa isa ka civilian mission.
Ini amo ang ginkumpirma ni PCG Rear Admiral Jay Tarriela.
Suno kay Tarriela, makapila ka beses nga nagpalab-ot sang mensahe ang PCG sa Chinese Coast Guard pamaagi sa radyo matapos nga yara na sa 4 tubtob 10 nautical miles lang ang kalayuon sang mga barko nga nagabantay sa ila kag agud man nga ipahanumdom sa mga ini nga wala sila sang hurisdiksyon sa Philippines’ Exclusive Economic Zone base sa international arbitration tribunal.
Wala man sang nagluntad nga tensyon sa duha ka bahin matapos nga hilway man nga nakapadulong ang barko sang Pilipinas sa Pag-asa island.
Nahibaluan nga lakip sa mga pasahero sang nasambit nga PCG vessel amo ang mga doctor, nurse, dentista, kag pari, para sa Coast Guard district sa Kalayaan Island Group
