Nag-file si Senador Ronald “Bato” Dela Rosa sang duwa kag hagna sa tunga sang iya padayon nga pag-absent sa Senado.
Base sa rekord sang Senado, kalakip sa hagna nga ginpirmahan ni Dela Rosa amo ang Proposed Senate Bill (SB) No. 2080 ukon ang Counter Foreign Interference Act nga nagasilot sa pagpasilabot sang mga dumuluong sa pungsod.
Gin-file niya ini sang Lunes kadungan sang pagbalik sang sesyon matapos ang isa ka bulan nga recess.
Gin-file man niya ang Senate Bill No. 2079 ukon ang National Police Clearance System Act, nga nagatuyo nga pabaskugon ang operasyonalisasyon sang sistema.
Kalakip man sa hagna ang pagpabilin sang centralized record sang tanan nga na-report nga crime incidents, warrants of arrest, mga laragway kag personalized details sang mga gin-aresto kag wanted persons.
Matandaan, nga humalin sang Nobyembre 2025, wala pa nagpakita sa publiko si Sen. Dela Rosa.
Wala man ini nakaagi tambong sa ano man nga sesyon sa Senado sa tunga sang naggwa nga impormasyon nga nag-isyu ang International Criminal Court (ICC) sang arrest warrant batok sa iya kaangot sa kontrobersiyal nga war on drugs.
Nagapangatubang man ang Senador sang ethics complaint bangud sa malawig nga pag-absent.
Ginapakomento man siya sang Senate ethics committee sa ginaduso nga amyendahan ang rules kalakip ang “no work, no pay” policy para sa mga naga-absent nga senador.
