Nagpabutyag sanday Senator Risa Hontiveros kag Senator Pia Cayetano sang ila tagsa ka mga balatyagon may kaangtanan sa nagluntad nga kinagamo kag lukpanay sa Senado sang nagligad nga semana, Mayo 13.
Suno kay Hontiveros, indi sini mabaton nga kaangay normal lamang ang tanan matapos ang insidente kag kaangay wala sang may natabo nga pagbastos sa institusyon sang Pilipinas kag sa mga Pilipino.
Ginmuno man sini ang pag-Facebook Live, press conference kag media interviews nga suno pa sa iya nga dapat indi pag-iasa sa amo nga pamaagi ang pagtahi-tahi sang hitabo sa Senado.
Dugang pa sang Senadora nga indi dapat pag-ikonsiderar nga gamay nga bagay ang amo nga butang bangud sila sa Senado nahibaluan mismo kun ano ang sala kag insakto.
Samtang, kasunod sang pagpabutyag ni Senator Risa Hontiveros sa natabo nga komosyon sa Senado, nangin emosyonal naman si Senator Pia Cayetano sa plenary session samtang ginapakigbahin ang iya na-eksperyensyahan sa natabo nga lukpanay sa senate building.
Ginpabutyag sang Senadora ang iya pagkadismaya bangud kaangay nga wala sang labot ang mga kaupod sini nga mga Senador, ilabi na sa minorya sa kun ano ang ila na-eksperyensyahan sa amo nga insidente.
Pahayag pa sini nga biskan pangamusta ukon pagkabalaka wala gid sini mabatyagan kag tuman ini nga nasakitan bangud sa kadugayon na nila nga mag-updanay sa Senado wala gid sang may nagpamangkot sang ila kahimtangan sa natabo.
Dugang pa sang Senadora nga may mga kabataan ini nga nagahulat sa iya kag suno sa pa sa iya, naglisensya na ini sa iya kabataan sa kun ano pa ang posible nga matabo sa iya bangud sa asud-asud nga lupok sa sulod sang Senate building.
Ginpunto man sini nga indi lamang seguridad ang dapat tutukan kundi pati man ang emosyonal kag mental nga epekto sang amo nga insidente sa mga nagtinir sa sulod sang building sa tion sang kinagamo.
