Ginkumpirma sang Department of Justice (DOJ) nga nakapasa na sila sang request para sa Red Notice sa Interpol batok kay Ronald “Bato” dela Rosa.
Suno sa DOJ, kabahin ini sang legal nga proseso agud mapatuman ang arrest warrant nga ginpagwa sang International Criminal Court (ICC) may kaangtanan sa mga kaso nga crimes against humanity kaangot sa “war on drugs” campaign sang nagligad nga administrasyon.
Ginpahayag man sang ahensya nga ginakabig na bilang “fugitive from justice” si Dela Rosa kag ginmandu-an na ang mga law enforcement agencies pareho sang Philippine National Police (PNP) kag National Bureau of Investigation (NBI) nga arestuhon ini.
Sa website sang Interpol, ginpaathag nga ang red notice amo ang request sa law enforcement sa bilog nga kalibutan nga tultulon kag arestuhon (provisionally) ang isa ka tawo samtang pending ang extradition, surrender, ukon similar legal action.
Ginpanindugan man sang ahensya nga nag-agi sa insakto nga proseso ang ginaplano nga implementasyon sang arrest warrant sang ICC batok kay dela Rosa — kabaliskaran sa ginapahayag sang kampo sang senador.
Suno kay Atty. Polo Martinez, nagapadayon ang ahensya kag ang gobyerno sa ila posisyon nga enforceable ukon epektibo ang pagdakop kay dela Rosa.
Ginhingyo man sang DOJ ang publiko nga magsugid sa mga awtoridad kun may nahibaluan sila parte sa ginakadtuan ukon ginatiniran sang senador.
Una naman nga nagsabat ang NBI nga arestuhon nila ang fugitive senator nga wala sang delay kag wala sang kahadlok, kag dakpon nila ini bisan gusto man sini ukon indi.#
