Gin-eleher sanday Senator Rodante Marcoleta kag Senator Jinggoy Estrada bilang vice chairmen sang Senate Committee on Accountability of Public Officers and Investigations ukon ang gamhanan nga Blue Ribbon Committee.
Ginhingadlan naman bilang mga myembro sang committee ang majority senators nga sanday Sen. Bong Go, Sen. Robin Padilla, Sen. Camille Villar, Sen. Mark Villar, Sen. Chiz Escudero, kag Sen. Imee Marcos.
Gin-anunsyo ini sa session sang Senado kahapon, Mayo 25.
Sang nagligad nga semana, nauna na nga gin-eleher si Senator Pia Cayetano nga amo ang bag-o nga chairperson sang amo nga committee matapos ginkakas ang minority senator nga si Sen. Panfilo “Ping” Lacson.
Nahibaluan nga kadam-an sa sini nga mga senador ang may ginapangatubang nga kaso, panumbungon, ukon ginapaidalom sa imbestigasyon.
Si Go ang na-identify nga co-perpetuator sa crimes against humanity case ni former president Rodrigo Duterte sa International Criminal Court (ICC).
Si Escudero naman ang napaidalom sa preliminary investigation sa kaso nga plunder sa Office of the Ombudsman kaangot sa flood control scandal.
Nagrekomendar naman anay ang Department of Justice (DOJ) nga kasuhan si Estrada sang kaso nga plunder kag graft kaangot sa flood control scandal.
Gina-review naman sang Sandiganbayan ang rekomendasyon sang DOJ nga kasuhan si Senator Joel Villanueva kaangot man gihapon sa flood control issue.
Nagrekomendar naman ang Office of the Ombudsman-Field Investigation Bureau sa pag-file sang kaso nga plunder kag bribery batok kay Marcoleta bangud sang alleged campaign donations nga nagdangat sa P75 million.
Ang mag-utod naman nga Villar ang nalakip sa imbestigasyon sang DOJ sa alleged involvement sang ila negosyo sa market manipulation, insider trading, kag iban pa.#
