Ginkondenar sang mga senador sa minority bloc ang pagdali sang majority nga iduso ang pagbag-o sa Senate rules.
Ini ang kaangot sa mosyon ni Senator Rodante Marcoleta nga tugutan nga makaboto ang ila mga kaupdanan nga Senador online ukon bisan wala sila sa mismo nga session sa chamber.
Sa joint statement sang minority bloc nga gin-post kagab-i, Mayo 26, ginkwestyon nila kun ngaa ginadalian gid nga lainon ang pagsulundan sang Senado kag kun himuon bala ini para sa benepisyo sang iban nga mga senador nga posible ma-detain.
“Bakit kailangang madaliin? Bakit kailangang pigilan ang mga gustong magsalita? Bakit kailangang i-divide ang house kung marami pang senador ang nagtatanong tungkol sa proseso? Minamadali ba ang rule change na ito dahil gusto nilang maka boto si Senator Bato? At ngayong may mga ulat na may mga majority senators na maaaring arestuhin?,” suno sa joint statement.
Wala sang may ginmensyonar nga pangalan kun sin-o ang mahimo arestuhon apang sanday Sen. Jinggoy Estrada kag Sen. Joel Villanueva nga pareho nga halin sa majority bloc ang ginlawag sang Ombudsman nga posible kasuhan sang plunder sa Sandiganbayan bangud sa ginaalegar nga kahilabtanan sa flood control scandal.
“We have always welcomed healthy discussions on the floor, but this should mean allowing all members to be heard, not forcing the chamber to move at the speed preferred by the majority,” suno pa Senate minority.
Ginmuno man sang minorya nga ginpadayon ang diskusyon sa proposal bisan nga wala sang duly constituted Committee on Rules kag elected Majority Leader nga amo ang maga-giya sang maayo sa rules amendment paagi sa regular process.
Gina-insister man sang minority senators nga dapat mag-agi anay ini sa proper deliberations kag public debate.
“Kaya pinili naming tumayo at iwan ang majority sa plenary. Kaya kami nagdesisyon to question the quorum and call for adjournment. If the proposal is truly defensible, then let it pass through the proper route,” suno pa sa minority kasunod sang ila nga pag-walkout kagab-i.
Bangud wala na sang quorum kasunod sang walkout, ginpahayag ni Senate President Alan Peter Cayetano nga indi na mag-object ang majority sa motion to adjourn. Magabalik ang sesyon sa Hunyo 1, Lunes, alas singko sa hapon.#
