Ginplastar sang isa ka Bombo Abogado nga dapat talakayon anay sa committee level ang ano man nga pag-amyenda sa Senate rules bag-o ini dal-on sa plenaryo.
Ini nagaugyon man sa panindugan sang mga senador sa minority bloc sang Senado.
Kahapon nangin sentro sang mainit nga diskusyon sa Senado ang kaangay pagpilit sang majority bloc nga talakayon gilayon sa plenaryo ang mosyon nga pagpahanugot sa remote ukon online participation sang mga senador sa mga sesyon.
Sa interview sang Bombo Radyo kay Atty. Noel Palomado, iya ginpahayag nga dapat anay nga mapasa sa Committee on Rules ang amo nga proposal bangud ini ang husto nga proseso sa pagtalakay sang mga pagbag-o sa internal rules sang Senado.
Suno kay Palomado, importante nga madebatehan anay ini sa committee kag dapat nga may yara sang committee report kag committee resolution antes ini dal-on sa plenaryo sang senado.
Matandaan nga nag-walkout ang mga senador sang minority bloc bilang protesta sa ginaalegar pagdali sang majority nga aprubahan ini sa plenaryo.
