Gindala na sa New Quezon City Jail sa Payatas, Quezon si Senator Jinggoy Estrada kag ang tatlo ka iban pa nga akusado sang plunder nga naangot sa flood control scandal.
Sandig sa kumpirmasyon sang Department of the Interior and Local Government (DILG), ginpasulod si Estrada sa presuhan eksakto 8:15 kagab-i kaupod ang ang duha ka district engineers nga sanday Manny Bulusan kag Arturo Gonzales Jr.
Antes sa ila, may isa pa ka district engineer nga si Denryl Caesar Cortuna nga gindala sa amo man nga presuhan pasado alas singko kahapon sang hapon.
Suno sa Department of the Interior and Local Government, ang tanan nga mga indibidwal nga ginapasulod sa amo nga pasilidad ang nagaagi sa pareho nga proseso kag detention protocols bisan ano pa man ang ila posisyon ukon status.
Matandaan nga ginmandu sang Sandiganbayan Fifth Division nga arestuhon si Estrada kag ang tatlo ka nasambit nga engineers amo man si former Public Works and Highways Secretary Manuel Bonoan bangud sa kaso nga plunder.
Indi mapyansahan ini nga kaso kag may silot nga reclusion perpetua.
Gindakop sa Senado si Estrada samtang si Bonoan naman ang ang tatlo ka iban pa nga akusado ang nagsungka sa Criminal Investigation and Detection Group (CIDG) sa Camp Crame.
Sa statement sang DILG, ginkumpirma man nga gindala si Bonoan sa PNP General Hospital matapos nagpaidalom sa booking procedures sa Camp Crame.
Gindala ini sa ospital matapos naglab-ot ang iya blood pressure reading sa 192/100.
Si Estrada amo ang pinakamataas nga sitting official nga naaresto halin sang naglupok ang ang eskandalo sa flood control.
Ini ang ikaapat nga set sang kaso nga naangot sa flood control nga naglab-ot sa Sandiganbayan matapos ang mga kaso batok kanday Zaldy Co sang Nobyembre 2025; Sarah Discaya sang Disyembre 2025; kag former senator Ramon “Bong” Revilla Jr. sang Enero.
Ini naman ang ikatatlo nga tion nga may kaso nga plunder batok kay Estrada.
Na-acquit siya sa pareho nga duha ka akusasyon nga naangot sa jueteng scandal sang 2001 kag sa pork barrel scam sang 2014.#
