Tuman ka kulang ang pwersa sang Gilas Pilipinas sa palaabuton nga third window sang 2026 FIBA Basketball World Cup Asian Qualifiers.
Suno kay Gilas head coach Tim Cone, indi liwat makaupod ang Pinoy ace big man nga si Kai Sotto.
Ginalauman nga magapasakop si Sotto sa NBA Summer League nga patigayunon sa July 9 to 19 sa Las Vegas., Nevada, USA.
Matandaan nga wala man nakaupod si Sotto sa duha ka windows bangud sa post-ACL surgery rehabilitation.
Nakahampang siya anay sa Orlando Magic sa 2023 NBA Summer League. Nakaupod siya sa duha ka games sa amo nga tournament.
Magluwas kay Sotto, wala man ang 6-foot-10 player sang Gilas nga si Quentin-Millora Brown bangud sa nagapadayon nga back surgery recovery.
Una naman nga nakahingyo si June Mar Fajardo nga indi ini anay mag-upod sa July window sa hampang batok sa powerhouse sides sang Australia kag New Zealand bangud nagaplano ini nga magpaidalom sa surgery. Apang bangud wala si QMB kag si Kai, nagpasugot ang nine-time PBA MVP suno kay Cone nga irepresentar liwat ang Pilipinas.
Una naman nga ginkumpirma ni Calvin Oftana nga magapaidalom man siya sa surgery bangud sa infected toe kasunod sang PBA Commissioner’s Cup Finals.
Nagauyat subong ang Pilipinas sang 2-2 record sa Group A sang amo nga tournament.#
