Ginhangkat ni National Bureau of Investigation (NBI) Director Melvin Matibag si Senator Alan Peter Cayetano nga atubangon siya sa Senate blue ribbon committee hearing sa Lunes, Hunyo 8.
Suno kay Matibag, sa ila pagkit-anay ni Cayetano, pwede siya nga bubu-an sang mga pamangkot pati na ang iya paborito nga color.
“Alan Peter Cayetano is still a member of the Senate. Kung gusto niya akong makaharap at tanungin, mag-attend siya sa hearing sa Lunes. Nandoon ako,” pahayag sang opisyal.
Dugang pa sang NBI Director, nabaton na niya ang imbitasyon halin sa Blue Ribbon Committee nga ginapangunahan sang newly elected chairperson nga si Senator Erwin Tulfo.
Gintawag niya ini nga “proper committee.”
“You can ask every question that you have for me, even my favorite color,” mensahe sini kay Cayetano.
Ini nga hangkat ni Matibag ang kasunod sang natabo sang Huwebes kun sa diin ginhangkat man ni Cayetano ang NBI Director nga mag-atubang sa ila nga committee kag magpresentar sang mga ebidensya kaangot sa alegasyon sini nga nakabaton sang suhol ang 18 ex marines.
Para naman kay Matibag, indi pormal nga imbitasyon ang ginhimo ni Cayetano kag daw kaangay nga yara lang sila sa pansitan.
Gintawag man sini nga indi lehitimo ang Blue Ribbon Committee nanday Cayetano.
BLUE RIBBON HEARING SA LUNES
Nauna na nga ginpahayag ni Tulfo nga ipadakop sini ang sin-o man nga senador nga magpatigayon sang hearing sa idalom sang Senate Blue Ribbon Committee magluwas sa hearing nga iya iga-preside.
Si Tulfo ang chairman sang amo nga committee nga gin-eleher sang Gatchalian Bloc matapos nakalab-ot sila sa 12 nga quorum sa Senate plenary hall sang Myerkules, Hunyo 3.
Wala ini ginakilala sang grupo nanday Senator Cayetano kag nagapanindugan si Cayetano nga siya gihapon ang Senate President.
Sang Huwebes, nagpatigayon sanday Cayetano sang hearing sa Blue Ribbon nga ginpangunahan ni Senator Rodante Marcoleta kun sa diin gin-imbitar ang ex marines.
Suno naman kay Tulfo, siya ang lehitimo nga chairman sang Blue Ribbon Committee kag siya lamang ang may awtoridad nga magpatawag sang legislative inquiry sa idalom sang amo nga komitiba.
Pahayag pa sini, kun masulit pa gani nga may iban nga senador nga magpatigayon sang hearing, ipaaresto niya ini kag palayason sa Senate floor.
Suno pa sa iya, wala siya sang pili-on sa ipaaresto — bisan nga tigulang na, bisan nga madugay na sa senado, bisan nga former senate president man ini, ukon bisan nga former house speaker. Suno pa kay Tulfo, kun indi maghulag ang Office of the Sergeant-At-Arms ukon OSAA, siya mismo ang mahulag agud nga mapalayas ang senador nga magahimo sang iya kaugalingon nga hearing.#
