Nagpangayo sang pasaylo si Erwin Tulfo sa mga senador nga kaalyado sang kampo ni Senator Alan Peter Cayetano bangud sang iya nauna nga pahayag nga ipaaresto sini ang bisan sin-o nga senador nga maga-conduct sang hearing sang Blue Ribbon Committee magluwas sa inquiry nga siya ang maga-preside.
Si Tulfo ang chairman sang amo nga committee nga gin-eleher sang Gatchalian Bloc matapos nakalab-ot sila sa 12 nga quorum sa plenary hall sang Myerkules, Hunyo 3.
Wala ini ginakilala sang grupo nanday Cayetano kag nagapanindugan ini nga siya gihapon ang Senate President kag ang iya utod nga si Pia Cayetano ang chair sang amo nga committee.
Sang nagligad nga semana, nagpahayag si Tulfo nga siya ang lehitimo nga chairman sang Blue Ribbon Committee kag siya lamang ang may awtoridad nga magpatawag sang legislative inquiry sa idalom sang amo nga komitiba.
Pahayag pa sini, kun masulit pa gani nga may iban nga senador nga magpatigayon sang hearing, ipaaresto niya ini kag palayason sa Senate floor.
Suno pa sa iya, wala siya sang pili-on sa ipaaresto — bisan nga tigulang na, bisan nga madugay na sa senado, bisan nga former senate president man ini, ukon bisan nga former house speaker.
Suno pa kay Tulfo, kun indi maghulag ang Office of the Sergeant-At-Arms ukon OSAA, siya mismo ang mahulag agud nga mapalayas ang senador nga magahimo sang iya kaugalingon nga hearing.
Sini gid lamang nga weekend, gin-ako ni Tulfo nga indi nagakaangay ang iya mga ginhambal parte sa pagdakop, pagpwersa, kag pagpagguwa kay Cayetano kag sa iban pa nga mga persona sa sesyon ukon plenary hall, gani naghatag siya sang sinsero nga pagpangayo sang pasaylo sa iya mga kaupdanan.
“I sincerely apologize to my colleagues for my aggressive remarks regarding the arrest, manhandling, and dragging of Senator Cayetano and other individuals out of the session or plenary hall,” suno sa senador.
Dugang sini: “This is not how an official, much less a senator, should behave.”
Ginpaathag niya nga ang iya emosyonal kag indi nagaka-angay nga mga tinaga naghalin sa iya katuyuan nga magpadayon ang trabaho sang Senado nga wala sang dugang nga delays.
Nagpangayo man siya sang pasaylo sa mga Pilipino bangud nga ang mga tensyon sa Senado nagresulta sa pagtapos sang sesyon nga wala sang may napasar nga importante nga mga hagna.
“Because of recent clashes, the session ended without advancing crucial legislation. Because of the seemingly endless arguments on politics, our mandate was paralyzed,” suno pa sa iya.
Pagkatapos sini, nanawagan siya sa iya mga kaupdanan sa Senado nga tapuson ang pagbahin-bahin kag mag-isa na liwat agud makabalik sa ila responsibilidad.
“Let’s craft laws, investigate irregularities without fear, and put every Filipino’s welfare first. Unity doesn’t mean backing down from the fight—it means joining forces to protect our nation,” pahayag pa ni Tulfo.#
