Chiz Escudero, nanginwala sa akusasyon nga nakabaton siya sang maleta

Ginpangbali ni Senator Francis “Chiz” Escudero ang mga akusasyon sa iya kaangay sang pagbaton sang maleta nga may unod nga kuwarta kabaylo sang pagtambong niya sa sesyon sang Senado sang Myerkules, Hunyo 3.

“Asan? Asan?” sabat ni Escudero sang ginpamangkot sa iya ang “maleta” issue kadungan sang iya latest podcast.

Ginpanginwala man sang former Senate leader nga may kaangtanan ini sa iya kaugalingon nga interes ukon sa mga ginaatubang sini nga isyu kag kaso kaangot sa flood control projects. Suno pa kay Escudero, wala sang labot ang Malacañang sa iya nga desisyon nga magpakita sa plenaryo sang amo nga adlaw.

“Lima ang nagsampa ng kaso laban sa akin. May limang kasong pending noon… tatlo sa limang ‘yon ay na-dismiss na, napatunayan namin na wala kaming kasalanan, hinarap namin isa-isa ‘yon,” suno sa iya.

“Nakabinbin ang dalawang kaso pa, hinaharap pa rin namin. At buo ang paniniwala namin na malalampasan namin ‘yan at mapapatunayan na wala kaming kasalanan,” dugang sini.

Ginpahayag man ni Escudero nga kun ano man ang iya sitwasyon, wala ini naglain.

“Kung ano ang sitwasyon ko bago (June 3), siya pa rin ang sitwasyon ko ngayon,” suno sa iya.

Panindugan niya, ang iya constitutional duty ang nagtulod sa iya nga magtambong sa session.

Ginpaathag sini nga gindumilian sang Constitution nga mag-adjourn ang diin man nga chamber sang Kongreso sang masobra tatlo ka adlaw nga wala sang pahanugot sang Kamara.

Matandaan nga 11-11 ang numero sang majority kag minority sang nagpalagyo na si Senator Ronald “Bato” dela Rosa kag napreso na si Senator Jinggoy Estrada.

Duha ka session days nga wala nagsipot ang grupo nanday Senator Alan Peter Cayetano sa session hall, apang sang Myerkules, nagpakita si Escudero nga amo ang rason kun ngaa naka-quorum ang grupo nanday former Senate President Tito Sotto matapos nga naka-12 sila sa sesyon, gin-eleher si Senator Win Gatchalian bilang Senate President Pro Tempore, kag sang ulihi bilang acting Senate President — bagay nga gintawag sang Cayetano bloc nga iligal.#