Nagtambong si Coach Tab Baldwin sa prayer vigil para sa duha ka student-athletes sang Ateneo De Manila University nga nagtaliwan kasunod sang team building activity sang men’s basketball team sa Dipaculao, Aurora.
Ini ang una nga tion nga nagpakita sa publiko si Baldwin halin sang napatay sanday Rene Baterbonia kag Divine Adili sang Lunes, Hunyo 8.
Ginhiwat ang pagpangamuyo sa sulod sang Ateneo campus kag gin-updan sang iban pa nga mga myembro sang Blue Eagles.
Nauna na nga gin-anunsyo sang unibersidad nga nag-leave anay si Baldwin kag ang team manager nga si Epok Quimpo samtang nga padayon ang imbestigasyon sa amo nga trahedya.
Antes kag pagkatapos sang vigil, wala pa sang nabatian nga paathag halin kay Baldwin kun ano ang mga sirkumstansya nga nagapalibot sa ginaalegar pagkalumos nanday Baterbonia kag Adili.
Nahibaluan nga nagalapta subong sa social media ang mga interview anay sa Ateneo players nga nagapanugid sang ila ekspersyensya sa “boot camp-style” activities sa Aurora sang nagahanas pa sila sa idalom ni Coach Baldwin.
Ginklaro naman sang Ateneo nga indi personal nga desisyon ni Baldwin nga maghipos sa isyu kundi nagasunod lamang siya sa request sang unibersidad nga indi anay magpaguwa sang public statements.
“His silence should therefore not be misconstrued as indifference or a lack of concern. Rather, it reflects the University’s decision to place care, healing, and due process ahead of public discussion,” suno kay Ateneo president Fr. Roberto C. Yap, SJ.
“As the various inquiries proceed, the University remains confident that the truth, established through facts rather than speculation, will in due course provide the clarity and understanding that this tragedy demands,” dugang sini sa official statement sang unibersidad.
Sa pihak sang amo nga official statement, masobra naman sa 163 ka mga faculty members sang Ateneo ang nagpanawagan sa school administration nga mangin transparent kag accountable kasunod sang insidente.
Ginkwestyon sang faculty members kun ginsunod bala ang university regulations kag “due process” sa aktibidad kag kun may safety measures bala kaangot sa paglangoy sa dagat.
Luyag man sang educators nga maklaruhan kun may suporta sa pamilya sang mga biktima amo man sa team members.
“We appeal for greater clarity and transparency from the University administration,” kabahin sang sulat sang faculty members.#
