Makakilibot ang nangin resulta sang una nga hampang sa Group H sa FIFA World Cup 2026 sang nagtakop sa 0-0 draw ang matchup sang 2010 World Champions nga Spain kag debutant nga Cape Verde.
Ginpatigayon ang hampang sa Mercedez Benz Stadium sa Atlanta, USA kag nagtakop alas dos sa kaagahon (Philippine Time).
Gindominar sang world no. 3 nga Espanya ang match nga may 21 shots para sa goal apang wala ini tanan nakalusot sa 40-anyos nga si Vozinha nga amo ang goalkeeper sang tuman ka gamay nga island nation.
Bisan ang Barcelona winger kag isa sa highest-profile players sa tournament nga si Lamine Yamal nga may injury apang ginpasulod bilang substitute sa 70th minute ang wala man sang nahimo para sa iya team agud nga maka-score sang goal.
European powerhouse ang Espanya kag amo ang nagkampyon sa FIFA World Cup sadtong 2010. Ini na ang ila ika-17 nga appearance sa World Cup kag naga-target nga makabawi subong nga tuig matapos nalutos sa Round of 16 sang 2022 sa Qatar.
Nagapang-64 naman sa ranking ang Cape Verde ukon Cabo Verde — ang second-lowest-ranked team sa 10 ka African representatives sa World Cup subong nga tuig. Ini ang ila labing-una nga pagtapak sa World Cup.
Magluwas sa Cape Verde kag Spain, naga-compete man sa Group H ang two-time FIFA World Cup champion nga Uruguay kag ang Saudi Arabia nga amo ang naglutos sa defending champion nga Argentina sa group match sadtong 2022.
