Ginbuksan na sa mga motorista subong nga adlaw, Hunyo 19, ang dalan sa Barangay East Timawa, Molo, Iloilo City.
Ini kadungan sang pagbisita liwat ni Department of Public Works and Highways (DPWH) Secretary Vince Dizon.
Ini nga proyekto ang ginabug-usan sang tatlo ka road sections kag may yara man sang drainage. Ginsuguran ang konstruksyon sini sang Pebrero 2025.
Matandaan nga sang nagbisita si Dizon sa Iloilo City sang Abril, gin-anunsyo sini nga naghatag siya sang tatlo ka bulan nga deadline sa Iloilo City District Engineering Office (ICDEO) kag sa kontraktor nga Noe’s Builders.
Matandaan nga nangin kontrobersyal ang amo nga P19.78-million nga proyekto kag ginreklamo ni Mayor Raisa Treñas kay Dizon.
Didto kag ginmandu gilayon ni Dizon sa ICDEO nga suguran ang pagtapos sa karsada. Ginsulit sini nga indi na niya luyag nga wala sang koordinasyon sa tunga sang ICDEO kag sa opisina sang alcalde.
Madumduman nga nangin suspended ang status sang amo nga proyekto matapos gin-isyuhan anay ni former Mayor Jerry Treñas sang cease and desist order kag stoppage order sang 2025 bangud ginpahayag nga wala nag-comply sang nagakaigu nga mga dokumento kaangay sang excavation permit, mayor’s permit, kag barangay permit.
Kasunod sang pagbukas na sang amo nga proyekto subong nga adlaw, nagpasalamat naman si Mayor Treñas sa DPWH.
Suno sa alkalde, nakit-an gid sini sa kada mag-istorya siya sa tiglikom, klaro gid ang focus nga amo ang pag-identify kag pag-address gilayon sa kinahanglanon sa proyekto, kag bangud sini, nagataas suno sa iya ang efficiency sang DPWH implementation.
Ginpasalig man sang alkalde nga magabulig ang Iloilo City Government paagi sa koordinasyon kag support services agud masiguro nga ang government projects indi na ma-delay kag ma-implement gilayon.
