Magaupod ang Archdiocese of Jaro sa White Movement bwas, Hunyo 28, bilang pag-isa sa kampanya sang religious kag civil society groups nga padayunon ang pagpanawagan sa pagpanabat sa tanan nga mga kurap sa pungsod.
Sa sulat ni Jaro Archbishop Most Reverend Midyphil Billones nga ginpadala sa mga tumuluo, ginpahayag sini nga gina-endorso sang arkidiyosesis ang amo nga paghulag kasunod sang panawagan mismo halin sa Catholic Bishops’ Conference of the Philippines (CBCP).
Ginakabig ini nga rally bilang “faith-based” kag “non-partisan expression” sang commitment sang simbahan sa kamatuoran, hustisya, salabton, kag katarungan.
Sa interview naman sang Bombo Radyo kay Msgr. Meliton Oso, ang director sang Jaro Archdiocesan Social Action Center, iya ginpahayag nga ginapangabay sang simbahan ang mga tumuluo nga magsuksok sang puti nga panapton kun magsulod sa mga simbahan bwas.
Ginapanawagan man ang pagbutang sang puti nga mga laso ukon ribbon sa mga simbahan, kapilya, Katoliko nga mga eskwelahan, sa mga institusyon, edipisyo, kag mangin sa mga balay kag mga salakyan.
Base sa simbahan, ang puti nga laso kag panapton amo ang senyales sang pag-isa ukon pagtingob nga naga-upod sa pagpangamuyo para sa nasyon kag para sa mga nagaserbisyo sa publiko.
Suno kay Msgr. Oso, pahanumdom ini sa publiko nga indi dapat magkapampante apisar nga may nauna na nga mga martsa kag rally sang 2025 kun sa diin ginpanawagan man nga presuhon ang mga kurap, papason ang kurapsyon, kag ibalik ang mga kinawatan.
“Our greatest sin is amnesia. We always forget. Kay abi naton nagmartsa kita kag damo-damo kita, daw okay na. Pero sin-o ang nadakop? Sin-o ang na-preso? Salamat nga may isa nga active senator kag isa ka former senator [nga nadakop] pero damo pa na sila, kay ang panawagan naton, ‘lahat ng sangkot, dapat managot’,” suno kay Msgr. Oso.
Ginatumod sini sanday former Senator Ramon “Bong” Revillla, Jr. kag si suspended Senator Jinggoy Estrada.
Gin-aresto si Revilla sang Enero 2026 bangud sang alegasyon sang graft kag malversation nga naangot sa multi-million peso flood control scandal sa Bulacan.
Hunyo 1 naman sang gindakop si Estrada bangud sa kaso nga plunder nga naangot naman sa alleged kickbacks sa ₱1.4 billion nga balor sang flood control projects sa amo gihapon nga probinsya.
Ginpahanumdom man ni Msgr. Oso nga indi lang pagpapreso ang panawagan sang simbahan kundi restitution ukon pagbalik sang kinawatan.
“Dapat ibalik ang kinawatan. Daw kampante na ang aton nga isigka-Pilipino [sa una nga panawagan]. Wala pa nalab-ot ang ginahandum naton nga ‘lahat ng sangkot, dapat managot’, gani dapat nga vigilant kita kag padayon nga mag-demand sa gobyerno nga pasabton gid ang tanan nga may labot,” suno pa sa JASAC director.
Nahibaluan nga ini nga White Ribbon March ang gin-organisar sang Catholic, Muslim, evangelical, kag Protestant leaders.
Nagpaguwa man sang pastoral message si CBCP President Archbishop Gilbert Garcera nga naga-engganyo sa mga Katoliko nga magpadayon sa pagpangamuyo para sa pungsod kag nagapangabay nga himuon lang ang paghulag nga malinong kag nakasentro sa pagpangamuyo.#
