Nagpakig-angot na ang kapulisan sa mga opisyal sang Barangay San Pedro, Molo, Iloilo City matapos nabaton ang report nga may mga kabataan nga nagalinagsanay kag nagaginamo sa Iloilo Esplanade 2 sa dis-oras sang kagab-ihon.
Natabo ini kagab-i kun sa diin nakuhaan sang video sang concerned citizen ang ginapatihan nga mga menor de edad nga lalaki nga nagalagsanay kag nagasinggitanay.
May iban sa ila nga wala pa sang pang-ibabaw nga panapton apang may tabon ang nawong.
Sa post sang concerned citizen, nagpanawagan ini sa Iloilo City Government, barangay officials, kag concerned authorities nga maghulag agud nga mapabilin nga safe ang Esplanade para sa mga indibidwal nga luyag lang kuntani maka-enjoy sa syudad.
“I respectfully ask our local government, barangay officials, and law enforcement agencies to strengthen security and increase patrols in the area, especially during late hours. I also hope that appropriate interventions can be made for the young people involved so that incidents like this can be prevented in the future,” post sang concerned citizen sa Facebook.
Ginakwestyon man sini kun sa diin ang mga ginikanan nga amo ang may responsibilidad nga magtatap kag magdisiplina sa ila mga anak.
“Diin ni mga ginikanan nila!? Gina pangita ni sila bala sang ginikanan nila? Din na to ang mga ginikanan ng ga pang lagas barakol kong alas sais palang wala pa kapule ang kabataan. Parent and guardians always know where your children are labin nagd sa dis oras sang kagabehon. Guidance, supervision, and open communication at home can make a real difference guid. Ndi na pag hulata nga maulihi ang tanan,” dugang sini.
Ginpahanumdom sini nga dapat safe ang pampubliko nga lugar para sa tanan nga luyag kuntani maglakat-lakat ukon mag-exercise.
“This post is not meant to shame anyone but to raise awareness and encourage action before someone gets seriously hurt. We all share the responsibiliy of keeping Iloilo peaceful and safe for everyone,” suno sa netizen.
Sa interview naman sang Bombo Radyo kay Police Captain Ryan Christ Inot, hepe sang Iloilo City Police Station 4, iya ginpahayag nga nabaton nila ang report pasado ala una sa kaagahon kag gilayon man nga ginrespondehan sang pulis.
Suno kay Inot, wala gid sila sang may na-hold nga mga bata bangud lunsay sila nagdalagan sang nakit-an na ang patrol car.
Gilayon naman nga nagpakig-angot si Inot sa punong barangay sang San Pedro bangud ginapatihan nga taga-didto lang ang duha ka grupo kag may suyaay nga natabo.
Ginpanugyan sang pulis nga butangan sang barangay tanod ang amo nga area, kag pananglitan may mga amo sini nga hitabo, magtawag gilayon sa mga kapulisan agud nga marespondehan.
“Indi ta man mahambal nga indi gid safe kay wala man sang daku nga insidente sa Esplanade. Ang ila man lang concern is ang away sang kabataan kag masolusyunan pa man ina as long as ang barangay kag kapulisan nagabuligay,” suno kay Inot.
