Nagapati ang prosecution team nga nagauyang lang sang papel ang kampo ni Vice President Sara Duterte sa ila padayon nga pagpetisyon agud mapa-untat ang impeachment trial.
Suno ini kay House Prosecutor Rep. Terry Ridon kasunod sang tikang sang mga abogado nga kaalyado ni Duterte kahapon nga naghingyo sang temporary restraining order (TRO) halin sa Korte Suprema.
Sa ila gin-file nga very urgent manifestation with motion, ginpangunahan ni Atty. Israelito Torreon ang pagpangabay sang status quo ante order ukon ano man nga nagakaigu nga interim relief agud nga mamanduan ang impeachment court nga indi anay pagpadayunon ang trial proper.
“Ilang petisyon na ‘yan eh. Ilang mosyon na ‘yan. Hindi pa ba sila naawa sa puno? Nagsasayang sila ng papel. Kasi ang totoo naman, ang lunsaran ng laban ay wala na sa Korte Suprema. Andito na sa Senado. Nakakatawa na ‘yung absurdity ng position na in each and every time kailangan ipaliwanag ng depensa na mayroon silang pending proceedings sa Supreme Court questioning all of these… We will proceed with the impeachment trial until the very end,” pahayag ni Ridon.
Samtang, ginpahayag naman ni House Impeachment Trial spokesperson Representative Zia Alonto Adiong nga yara sa poder sang Senado ang pagpili sang presiding officer sang impeachment court. Pahayag sini, internal rules ini sang Senado kag ang mga senador mismo ang may katungdanan sa pagdesisyon sini.
Nahibaluan nga luyag sang mga abogado nga nag-petisyon nga wala anay sang proceedings samtang wala pa sang desisyon ang Korte Suprema sa ila ginakwestyon nga legalidad sang mga patakaran kag sa pag-eleher kay former Senate President Francis “Chiz” Escudero bilang presiding officer sang impeachment court.
Suno sa mga abogado, dapat nga magpadayon lang ang trial kun sigurado nga valid ang rules nga ginagamit kag wala sang konstitusyonal nga isyu sa nagapamuno sang korte.
“Petitioners thus respectfully submit that a temporary restraining order, status quo ante order, or other appropriate interim relief is warranted to ensure that the impeachment trial proceeds, if at all, only under Rules of Procedure on Impeachment Trials validly adopted and only under a presiding officer whose authority to preside is not under serious and unresolved constitutional challenge,” suno sa petitioners.
Ginpahayag man nila nga ang mga hitabo sa Senado sang Hunyo 3, 2026 lakip ang pag-aprubar sang mga pagbag-o sa impeachment rules kag ang pagtalana kay Escudero bilang presiding officer ang may daku nga epekto sa legalidad sang impeachment trial.
“Otherwise, constitutional review may be reduced to an after-the-fact pronouncement on proceedings that have already moved forward under a cloud of illegality,” dugang sa ila nga petisyon.
Ginpahayag man sang kampo ni Duterte nga base sa deliberasyon sang 1987 Constitution, ang Chief Justice lang ang dapat mag-preside kun ang Presidente ang gina-impeach.
Sa iban nga impeachment cases, pareho sa kaso sang Bise Presidente, ang Senate President ang dapat magpanguna ukon si Senate President Sherwin Gatchalian.
Indi pa sigurado subong kun dal-on ini nga urgent motion kag manifestation sa regular full court session sang Korte Suprema subong nga adlaw, Hulyo 8.#
