Ginpalawig sang Energy Regulatory Commission (ERC) ang suspensyon sang pag-utod sang serbisyo sang kuryente sa residential kag non-residential consumers bilang kabahin sang ginpatuman nga state of national energy emergency.
Sa advisory sang ahensya, ginpahayag nga indi anay mahimo ma-utdan sang kuryente ang mga konsumidor nga indi makabayad sang ila bill para sa billing period halin Agusto tubtob Oktubre 2026.
Matandaan nga sang Mayo, may yara man sang “no disconnection” policy nga ginpatuman tubtub subong nga Hulyo gani nga ginpaguwa ini nga direktiba para nga ma-extend ang implementasyon sang polisa.
Ginmanduan sang ERC ang tanan nga distribution utilities sa Luzon, Visayas kag Mindanao nga indi magpatuman sang disconnection sa ila mga consumer nga wala makabayad sang electric bill.
Nakabutang man sa mandu sa power distributors nga magpatuman sang staggered ukon utay-utay ukon deferred payment scheme agud mapamag-an ang pinansyal nga palas-anon sang mga consumer.
Suno sa ERC, ang mga consumer nga naga-usar sang indi magsobra sa 200 kilowatt-hours kada bulan mahimo mag-defer anay sang bayad sa ila electric bill para sa Extended Covered Billing Period kag bayaran ini sa staggered basis sa indi magnubo tatlo ka bulan pagkatapos mabaton ang billing statement.
Gin-athag sang komisyon nga mahimo gihapon magbayad sang bug-os nga kantidad ang mga consumer nga may ikasarang nga maghatag sang bayad.
Lakip man sa direktiba sang ERC ang pagmandu sa mga generation company, National Grid Corporation of the Philippines, National Power Corporation, Power Sector Assets and Liabilities Management Corporation, National Transmission Corporation, Independent Power Producers, Independent Power Producer Administrators kag Market Operator nga magpatuman man sang pareho nga payment scheme para sa mga distribution utility.
Kinahanglan man nga magsumite ang mga distribution utility sang report sa ila pagsunod sa direktiba sa indi maglampas sa Oktubre 30, 2026.
