Ginkondenar sang Estados Unidos kag Australia ang pinakabag-o nga aktwasyon sang China sa Ayungin Shoal matapos mapilasan ang isa ka personnel sang Philippine Navy sa komprontasyon batok sa China Coast Guard.
Sa pahayag ni US State Department spokesperson Thomas Pigott, nanawagan ang Estados Unidos sa China nga untatan na ang ila ginatawag nga peligroso kag agresibo nga mga buluhaton sa West Philippine Sea.
Suno kay Pigott, ang mga ginahimo sang China batok sa legal maritime operations sang Pilipinas amo ang nagaguba sa kalinong kag seguridad sang rehiyon.
“The United States condemns China’s dangerous and aggressive actions against Philippine navy personnel at Second Thomas (Ayungin) Shoal in the South China Sea on July 20, 2026, and calls on China to immediately cease its destabilizing conduct,” suno kay Pigott.
“We stand with our ally, the Philippines, and commend the professionalism and restraint shown by Philippine navy personnel in this incident,” dugang sini.
Ginpasiguro man sang Estados Unidos ang padayon sini nga suporta sa Pilipinas kag gindayaw ang propesyonalismo sang mga personnel sang Philippine Navy sa tunga sang nagluntad nga insidente sang Lunes sa Ayungin Shoal.
Ginbali naman sang Chinese Embassy ang pahayag sang Estados Unidos kag gintawag ini nga wala sang basehan.
Samtang, nagpahayag man sang kahangawa si Australian Foreign Minister Penny Wong bangud sa nagluntad nga komprontasyon sa kadagatan.
Ginpasiguro ni Wong ang padayon nga suporta sang Australia sa Philippine Coast Guard kag gindayaw ang propesyonalismo, dedikasyon kag kaisog sang mga Pilipino nga personnel.
“We remain concerned about destabilizing and dangerous conduct in the South China Sea, some of which the Philippine Coast Guard knows too well, including the actions by Chinese vessels toward Philippine vessels we witnessed yesterday (Monday) morning,” suno kay Wong sa iya mensahe kahapon.
Sa ASEAN Foreign Ministers’ Meeting nga ginhiwat sa Manila, ginpresentar ni Foreign Affairs Secretary Ma. Theresa Lazaro ang insidente sa Ayungin Shoal sa iya kapareho nga mga foreign minister.
Apang suno kay Lazaro, wala sang nagkomento sa isyu bangud nagapadayon pa ang paghinun-anon sa tunga sang Pilipinas kag China.
Nagtutok ang mga foreign minister sa padayon nga negosasyon para sa Code of Conduct sa South China Sea nga nagatinguha malikawan ang paglala sang mga tensyon sa rehiyon.
Ginalauman man nga magaistoryahanay si Lazaro kag si Chinese Foreign Minister Wang Yi samtang padayon ang meeting.#
