Ginkumpirma sang legal team ni Vice President Sara Duterte nga yara ini subong sa The Hague, Netherlands samtang nagsulod na sa ikatatlo nga semana ang impeachment trial batok sa iya sa Senado.
Suno kay defense spokesperson Michael Poa, napahibalo naman kay Duterte ang subpoena sang Senate impeachment court para sa iya kag sa iya bana nga si Manases Carpio agud nga mapaguwa ang ila nga bank kag tax records.
Pahayag pa ni Poa, ginbaton lamang sang Bise Presidente ang report kag nagsiling nga nakahibalo na ang iya legal team kun ano ang dapat himuon.
Ginpahayag ni Poa nga wala sang ginatago si Duterte kag handa sila bisan magguwa pa ang mga nasambit nga dokumento.
Suno naman sa Office of the Vice President, kabahin sang biyahe sang Bise Presidente ang Qatar, United Kingdom kag Netherlands para sa opisyal nga mga aktibidad kag pagtililipon sa Filipino community. Halin ini sa Hulyo 16 tubtub sa Hulyo 31.
Ginpasiguro man sang OVP nga wala sang pondo sang gobyerno nga gamiton para sa bug-os nga biyahe sang Bise Presidente.
Samtang, ginpahayag ni Poa nga ginatun-an pa sang defense team kun magapasaka sila sang petisyon sa Korte Suprema agud kuwestyunon ang desisyon sang Senate impeachment court.
Suno sa iya, ginalantaw pa nila ang mga posible nga benepisyo kag epekto antes magrekomendar sini kay Duterte.
Matandaan nga sang Lunes, ginpahayag ni Senate impeachment court Presiding Officer Francis Escudero nga may precedent na ang pagpresentar sang bank records sa impeachment proceedings pareho sang natabo sa impeachment trial ni anay Chief Justice Renato Corona sang 2012.
Sa idalom sang Bank Secrecy Law suno kay Escudero, exempted ang impeachment cases sa pagsulundan sa confidentiality sang bank records kag privacy rights of depositors.
Ginbalibaran man ni Escudero ang argumento sang depensa nga indi na dapat malakip ang bank kag tax records ni Duterte antes siya nangin isa ka impeachable official.#
