Nagpagwa sang office order ang City Environment and Natural Resources Office Iloilo City agud magtukod sang Joint Inspection Team nga magpatigayon sang random inspection sa mga establisyemento malapit sa Diversion Road, Mandurriao, Iloilo City.
Ini matapos ang nakuha nga tonelada nga sebo nga nagalutaw-lutaw sa Iloilo River sang damlag lang.
Sa interview sang Bombo Radyo kay Engr. Niel Ravena, head sang Iloilo Ci, iya ginpahayag nga nagalaom sila nga kuntani naga-function lang ang tanan nga wastewater treatment facilities sang mga establisyemento agud malikawan ang pag-agas sang damog ukon sebo nga makahalit sa Iloilo River.
Suno pa kay Ravena, nakakuha na sang mga sample ang CENRO kag ginpadala na ang nakuha nga sebo sa laboratory examination agud mahibaluan kon may kemikal ukon iban pa nga pollutants ang nasambit nga sebo.
Nagpaandam man ang CENRO nga ang mga mapamatud-an nga naglapas sa environmental laws mahimo madagdagan sang ₱50,000 nga multa.
Dugang pa diri, posible man ang suspension ukon revocation sang permit sang mga establisyemento nga naglapas sa ordinansa.
Nagpanawagan naman si Ravena sa publiko kag sa mga establisyemento nga magbinuligay agud mabalik ang kalimpyo sang Iloilo River kag maprotektahan ang ecosystem sini.
