Nagdangat sa masobra 50 ang nasamaran matapos ang magnitude 6.8 nga linog sa southern Kumamoto prefecture sa Japan.
Una nga gin-report nga preliminary reading nga 7.1 magnitude ang linog apang gin-revise sang U.S. Geological Survey sa magnitude sa 6.8.
Nag-igu ini sa Kumamoto Prefecture sa Kyushu island 4:27 p.m. local time ukon pasado 5:27 oras sa Pilipinas.
Suno kay Bombo Josel Palma, madamo ang nagkalasamaran kag may na-report pa nga missing bangud nga nag-collapse ang porsyon sang isa ka shopping center,.
May tsunami advisory man nga ginpaguwa apang ginbawi ukon gin-lift.
Duha man ka mga tawo ang gin-report nga napatay.
Sa pabrika sang Nippon Paper Industries Co. sa Yatsushiro kun sa diin nag-collapse ang chimney kag naguba man ang isa ka bahin sang bilding bangud sang linog, 11 ka tawo ang naipit sa idalom sang mga nagkalaguba nga estruktura, suno sa Kumamoto emergency team.
Duha sa ila ang nasapwan nga wala na sang vital signs samtang wala pa mahibaluan ang kahimtangan sang siyam pa ka iban.
Samtang, ginpahayag sang Fire and Disaster Management Agency nga kapin sa 260,000 ka residente ang gin-abisuhan nga mag-evacuate, kadam-an sa Kumamoto Prefecture kag ang iban sa kaiping nga Nagasaki Prefecture.
Ginahibalo pa kun may mga Pilipino nga nasamaran sa amo nga mabaskog nga linog.
