Boluntaryo nga nagbalik sa Morocco ang linibo ka mga migrants nga nagdagsa sa Ceuta sa Espanya matapos ang natabo nga krisis nga nagbilin sang masobra 50 ka mga patay.
Base sa Spanish Interior Ministry, masobra na sa 48,300 ang nagbalik sa ila pungsod.
Nahamtang ang Ceuta sa Strait of Gibraltar sa entrada sang Mediterranean Sea. Napaidalom ini sa pagdumala sang Espanya halin sang 1580. Kilala ini nga syudad nga alagyan sang migrants nga nagatinguha nga makakita sang mas mayo nga kabuhi sa Europa.
Ginabanta nga 60,000 ka migrants ang nag-inabot sa amo nga syudad sang nagligad nga semana nga halos 70% na sang populasyon sang amo nga gamay nga teritoryo.
Suno kay Bombo International Correspondent Edzel Lamparero Lopez direkta sa Espanya, ginpinsar sang migrants nga kun mag-abot na sila sa Ceuta, may balay na sila nga tulugan. Apang baliskad sa ila ginalauman, nagsuprer sila sang gutom, tuman nga kakapoy, kag halos indi pagbatunon sang mga tumandok.
Bangud sang ila pagdagsa, nagtuga ini sang ginakabig “serious humanitarian crisis” kun sa diin nagtulog na lang ang kabataan sa dalan ukon mga parke samtang wala naman sang kadtuan ang kadam-an.
Nauna na nga gin-angot sang awtoridad sa Ceuta kag Madrid ang border surge sa ulihi nga desisyon sang Spanish Supreme Court. Ginpahayag man ni Spanish Prime Minister Pedro Sánchez nga sala ang interpretasyon sang migrant smugglers sa amo nga ruling. Naglapta ini suno sa iya paagi sa mga network sang human trafficking organizations.
Base sa record sang awtoridad, 57 ang nagkalamatay bangud sa pagkalumos kag stampede samtang ginatinguhaan nga makatabok sa breakwater fence sa Tarajal Beach, isa ka urban beach malapit sa border checkpoint sa Morocco.
Agud makalab-ot sa Ceuta, nagalangoy ang migrants halin sa banwa sang Fnideq sa Morocco. Ginabanta nga 3 miles ukon 5 kilometers ang kalayuon sini halin sa Spanish territory. May iban man nga nagalangoy kag nagaagi sa Belyounech nga mas may malip-ot nga distansya.
