Ginbasura sang Sandiganbayan ang pangabay sang Office of the Ombudsman nga kakason na si anay Department of Public Works and Highways (DPWH) Secretary Manuel Bonoan bilang isa sa mga kaupod nga akusado ni Senador Jinggoy Estrada.
Ini ang may kaangtanan sa kaso nga graft bangud sang gina-alegar nga korapsyon sa flood control projects.
Sa 12 ka pahina nga resolusyon nga ginpaguwa kahapon, Agosto 3, nagpahayag ang Sandiganbayan Second Division nga kulang sa merito ang Motion for Leave to File Amended Information nga ginpasaka sang prosekusyon.
Matandaan nga base sa Ombudsman, nagkunsabo ukon naghimbunanay sanday Estrada kag Bonoan sa pagbaton sang mga kickback gikan sa mga flood control projects.
Apang suno sa Sandiganbayan, kun kuhaon ukon kakason si Bonoan bilang akusado sa sini nga tion, magabag-o ang basehan sang kasohalin sa alegasyon sang conspiracy pakadto sa personal nga kriminal nga responsibilidad ni Estrada lamang.
“The proposed amended information removes the only co-accused and purported conspirator of accused Estrada from the case, thereby modifying the theory of criminal liability from one predicated on conspiracy to one imposing individual liability on the part of accused Estrada,” suno sa anti-graft court.
Ginpahayag sang korte nga mahimo nga indi ini mangin patas para kay Estrada ilabi na nga naka-file na siya sang iya plea sa korte.
Gindugang man sang Sandiganbayan nga suno sa Rules of Court, ang pagbag-o sa impormasyon sang kaso pagkatapos nga naka-file na sang plea ang akusado kinahanglan indi makapigos ukon makahatag sang disbentaha sa iya.
“The exclusion of his co-accused will compel him to prepare a different defense… Instead of focusing on an allegation of collective criminal responsibility, accused Estrada will confront a different theory that focuses exclusively on his personal acts and omissions,” pahayag pa sang korte.
Ginpaathag man sang korte nga ang ila desisyon wala nagapugong sa Ombudsman nga sa ulihi magpangabay nga himuon si Bonoan nga state witness sa kondisyon nga yara lang sa nagakaigu nga stage sang proceedings.
Matandaan nga sang Mayo, ginpasakaan sang Ombudsman sang kaso nga plunder kag graft sanday Estrada, Bonoan, kag pila ka opisyal sang DPWH-National Capital Region bangud sa gin-alegar nga kickback scheme sa mga flood control projects.
Suno sa imbestigasyon, naglab-ot sa masobra P573-million ang gin-alegar nga ilegal nga kwarta nga nahatag kay Senador Estrada.
Antes ang ginpatigayon nga arraignment ni Bonoan sang Hulyo 1, nag-file ang Ombudsman sang mosyon nga kuhaon ukon kakason siya sa kaso agud magkooperar kag makatestigo para sa prosekusyon para sa kaso nga ginalantaw ipasaka batok kay former House speaker Martin Romualdez.
