Naglab-ot na sa 82 ka mga tawo ang na-report nga napatay matapos gintay-og sang magnitude 7.4 nga linog ang Western Colombia nga nabatyagan man sa kaiping nga mga pungsod sa Latin America.
Napagkit ang pinakadamo nga patay sa western province sang Risaralda kun sa diin ginapahayag nga may kapin 40 ka fatalities.
Magluwas sa mga ginbawian sang kabuhi, indi pa matumod kun pila ang nakaangkon sang injuries kag ang mga missing matapos nga narumpag ang pila ka mga estruktura.
Sandig sa US Geological Survey, yara ang epicenter sang linog sa San Jose Del Palmar sa Choco region kun sa diin 4,800 ka mga tawo ang nagapuyo.
Nahamtang ini 400 kilometros sa nakatundan sang Bogota nga kapital sang amo nga pungsod.
Nag-igu ang linog sa kadalumon nga 66 miles (107 kilometres) kag nabatyagan pati sa kaiping nga mga pungsod nga Ecuador kag Panama.
Natabo ini 7:34 sa aga local time kun sa diin madamo nga mga tawo ang yara sa gwa. Nakit-an sa videos nga nagkaran-karan ang mga residente, nag-collapse ang pila ka mga building, kag na-trap pa ang pila ka mga pumuluyo sa mga debris nga nagkalahulog.
Suno sa interior ministry, masobra sa 20 ka mga banwa ang nakabatyag sang pagtay-og kag naapektuhan.
Gilayon man nga ginsuspinde ang flights sa mga paluparan kaangay sa Manizales, Quibdo, Armenia, Cartago y Buenaventura, kag Pereira.
Pahayag naman sang Colombian Geological Service, amo ini ang pinakamataas nga magnitude sang linog nga na-rehistro sa pungsod sa nagligad nga isa ka dekada. Ginsundan ini sang 2.8- kag 4.8- magnitude nga aftershocks.
Matandaan nga sang Hunyo 2026, gin-igu man sang kapid nga linog nga magnitude 7.2- kag 7.5 ang kaiping nga pungsod Venezuela sa northern South America kun sa diin masobra sa 5,000 ang nagkalamatay.
Ang Pacific Region sa Colombia malapit sa sentro sang linog ang yara sa “Ring of Fire” nga isa ka linya sang mga seismic fault nga nagapalibot sa Pacific Ocean sa diin nagakatabo ang kadam-an sang mga linog sa bilog nga kalibutan.
