Ginsabat ni House prosecutor Rep. Terry Ridon ang pabati-bati ni anay presidential legal counsel Salvador Panelo nga nagapresentar ang prosecution sang mga testigo nga wala sang pulos sa nagapadayon nga impeachment trial batok kay Vice President Sara Duterte.
Suno kay Ridon, basi may mga bahin sang trial nga wala masubaybayan ni Panelo bangud may tion nga nagakatulog ini samtang nagatambong sa trial.
Ginpanindugan man ni Ridon nga importante ang mga testigo sang prosekusyon bangud nagahatag sila sang mga impormasyon nahanungod sa iregularidad sa paggamit sang confidential funds ni Duterte.
Dugang pa diri, ginmuno man ni Panelo si Presiding Officer Sen. Chiz Escudero nga suno pa sa iya, wala sang control sa iya pagdumala sang proseso samtang nagapadayon ang trial.
Sa pihak sini, kumpyansa naman ang prosecution nga maayo ang ila pagpresentar sang ila mga testigo kag ebidensiya.
Suno kay Ridon, indi dapat pagdali-dalion ang trial agud mahatagan sang bastante nga tion ang prosekusyon, defense team, kag mga senador-judges nga mapahayag ang ila mga posisyon kag magwa ang matuod nga kamatuoran.
