Gin-dismiss sang Makati Prosecutor’s Office ang mga panumbungon nga ginpasaka sang driver ni Rhian Ramos batok sa aktres kag mga beauty queen nga sanday Michelle Dee kag Samantha Panlilio.
Lakip sa mga complaint ang illegal detention, slight physical injuries, maltreatment kag unlawful arrest.
Ang driver nga ginakilala lamang bilang Totoy ang nag-akusar sa mga celebrity kag mga bodyguard ni Dee nga gin-detain siya sa sulod sang isa ka condominium unit sa Makati halin Enero 17 tubtob 19.
Suno sa iya reklamo, gin-lock siya sa condominium matapos gin-akusahan nga nagkawat sang isa ka angpao nga may sulod nga sensitibo nga mga litrato.
Sa resolution nga may petsa Setyembre 1, ginbasura ni Makati Senior Assistant Prosecutor Mikhail Maverick Tumacder ang mga reklamo bangud kulang sang ebidensya.
Suno sa prosecutor, wala napamatud-an ni Totoy nga ginpilit siya nga magpabilin sa sulod sang condominium unit.
Sa pihak nga bahin, nagpahayag ang Volunteers Against Crime and Corruption, grupo nga nagabulig kay Totoy sa kaso, nga ila pagakuwestyonon ang desisyon sang prosecutor.
Gin-apresyar naman sang abogado ni Dee nga si Atty. Maggie Abraham-Garduque ang pag-dismiss sang mga reklamo.
“We are very happy with the resolution,” suno kay Atty. Garduque. “In the end, justice and truth prevail.”
Matandaan nga ginpasakaan man ni Dee sang theft case sang Mayo ang tagreklamo nga si Totoy.#
