Ginkwestiyon ni Iloilo City Councilor Rex Marcus Sarabia ang padayon nga rotational brownouts sa Visayas kun sa diin iya ginlaragway bilang “the height of government incompetence”.
Gin-call out man sini ang Department of Energy (DOE) kag Energy Regulatory Commission (ERC) bangud nga daw kaangay wala sang contingency plan ang mga ini nga ginaubra sa krisis sa kuryente sa Visayas.
Suno kay Sarabia, 33 gid ka powerplants ang offline ukon nagadalagan lamang sa sub-optimal/derated capacity nga nagtuga sang 962.9 MW nga kakulang sang kuryente sa grid.
Bangud sini, wala napunggan ni Councilor Sarabia nga makapamuyayaw sa tunga sang iya privilege speech sa ika-36th Regular Session sang Sangguniang Panlungsod kahapon nga adlaw, Setyembre 16.
Pahayag pa niya, indi na dapat kabigon nga ordinaryo nga power interruption ang padayon nga brownout nga nagaapekto sa mga panimalay, negosyo kag iban pa nga sektor sa Visayas.
Ginpunto niya nga naga-antus na sang masobra 73 ka adlaw nga sunod-sunod nga Red kag Yellow Alerts nga nagtuga sang rotational brownouts sa kabilugan sang syudad kag probinsya sang Iloilo, amo man sa bug-os nga rehiyon sang Visayas.
Dugang pa ni Sarabia, dapat na nga magpahilabot ang gobyerno kag amyendahan ang EPIRA law bangud napaslawan ang free market sa pag-amlig sang interes sang publiko.
