Nagpanawagan si United States President Donald Trump sa tanan nga pungsod nga miyembro sang International Criminal Court (ICC) nga magbiya na sa amo nga korte.
Sa iya spech sa 81st United Nations General Assembly sa New York, gintawag ni Trump ang ICC nga isa ka “rogue institution” ukon institusyon nga wala na sa husto nga pagdumala.
Suno pa kay Trump, indi dapat pag-imbestigahan sang ICC ang mga miyembro sang United States military ukon iban pa nga indibidwal bangod, suno sa iya, wala sang hurisdiksyon ang korte sa ila.
“The United States is equally opposed to the out-of-control institution known as the International Criminal Court,” suno sa US leader. “I call on all nations that are members of the ICC to officially resign from this rogue institution immediately.”
Ginhambal ini ni Trump samtang nagagwa ang mga report nga nagahanda ang iya administrasyon sang bag-o nga sanctions batok sa ICC matapos magpagwa ang korte sang arrest warrant batok kay Israeli Prime Minister Benjamin Netanyahu.
Sang Nobyembre 2024, ginkasuhan sang ICC sanday Netanyahu kag anay Israeli Defense Minister Yoav Gallant may kaangtanan sa gin-alegar nga war crimes batok sa mga Palestinian sa Gaza.
Indi miyembro sang ICC ang Estados Unidos kag indi ini obligado nga ipatuman ang arrest warrant batok kay Netanyahu.
Nauna naman nga ginsiling ni ICC Deputy Prosecutor Nazhat Shameem Khan nga wala ginbawi sang ICC ang mga arrest warrant ukon may kaangtanan nga mga aplikasyon batok sa mga opisyal sang Israel bisan pa sa pressure kag sanctions halin sa Estados Unidos.#
