Magapabilin sa 100% ang operasyon sang Western Visayas Transport Cooperative (WVTC) bangud sang financial assistance nga ihatag sang gobyerno.
Sa interview sang Bombo Radyo kay Mr. Raymundo “Boyet” Parcon, chairman sang WVTC, iya ginpahayag nga apisar sang daku nga pagsaka sa presyo sang gatong, makabulig sa ila ang P20,000 monthly assistance kada unit.
Magahalin ini sa Land Transportation Franchising and Regulatory Board (LTFRB).
Ginalauman suno kay Parcon nga mabaton na nila ini subong ukon sa masunod nga semana.
May 95 ka mga modernized jeepneys sa idalom sang amo nga transport cooperative nga may ruta nga Mohon, Ungka, kag Tagbak terminal pakadto sa Iloilo City.
Suno kay Parcon, gamiton nila ang kwarta para nga mabayaran ang benepisyo sang mga driver kag konduktor, lakip na ang mga kontribusyon sa Pag-IBIG Fund, Social Security System, kag Philippine Health Insurance Corporation ukon PhilHealth.
Ginpakigbahin sini nga may mga delay sila sang tion nga may pandemya.
Ginaplano man nila nga ibakal ang assistance sang diesel bilang stock ukon buffer agud nga may matigana sila kun matapos na ang government assistance kag kun magpadayon sa pagsaka ang presyo sang gatong.
Nauna na nga ginpahayag sang transport group nga kun wala sang assistance halin sa gobyerno, mapilitan sila nga magbuhin sang units nga ipa-byahe bangud indi na sila makasarang sa pagbayad sa gatong.
Ginpanawagan man nila ang fare hike, apang ginklaro sang Malacañang nga indi pa ini ang direksyon sang gobyerno subong.
Ginpaathag naman sang LTFRB nga magalawig ang assistance sa sulod sang tatlo ka bulan, kag ginalauman nga magabenepisyo diri ang 1,500 modernized jeepneys sa bilog nga Western Visayas.#
