Gin-athag sang Local Economic Enterprise Office (LEEO) nga wala sang ginasukot nga bayad sa mga manugbaligya sa Iloilo Terminal Market kun makit-an nga may lawa ang pwesto sang vendor.
Kaangot ini sa reklamo nga ginapahayag tag-P1,000 ang sukot sang Iloilo City Government sa amo nga violation.
Sandig sa reklamo nga nakalab-ot sa Bombo Radyo, nagpabutyag ang netizen nga “tanan na lang, may bayad.”
Sa interview naman sang Bombo Radyo kay Maricel Mabaquiao, head sang LEEO, iya ginpahayag nga may mga tion nga may notice of violation nga ginahatag, apang wala sang citation ticket kun sa diin may multa nga P1,000.
Paathag sang LEEO, gina-require ang tanan nga manugbaligya nga limpyuhan ang ila stalls agud nga mamentenar man ang bag-o nga merkado.
Suno kay Mabaquiao, indi dapat pag-isalig sa market sweepers ang pagpanglimpyo sa pwesto sang vendors bangud ang ila ginatinluan amo ang general area.
Ginpaathag sini nga may mga serye sang meetings sa kada section sang market kag nagalibot pa ang market enforcers, apang kun nagapabungol gid ang vendor, diri na kag ginadagdag ang notice of violation.
Paagi sa notice of violation suno kay Mabacquiao, makakadto ang violator sa market in charge ukon sa LEEO para nga mapahangop sa iya ang sala.
Suno pa sa natungdan, kun magpadayon gid ang indi pagsunod sa patakaran sang merkado, mahimo ini mangin ground agud nga kuhaon sa vendor ang iya stall ukon pwesto.#
