Kumpiyansa ang Committee on Appropriations sang Sangguniang Panlalawigan (SP) nga gamay na lamang ang kinahanglan nga diskusyunan sa proposed ₱7.86 bilyon nga budget sang Iloilo Province para sa tuig 2027.
Sa interview sang Bombo Radyo kay Board Member Dominic Paul Oso, iya ginpahayag nga ang para sa General Fund ang yara ₱6.1 sa kag ₱1.7 bilyon naman ang para sa Local Economic Enterprise (LEE).
Suno sa iya, nagdamo ang proposed budget bangud sa pagtaas sang National Tax Allotment (NTA), maayo nga performance sang mga provincial hospital sa ila targeted income, pagbaligya sang mga asset kag koleksyon halin sa real property tax amnesty.
Ginpahayag man niya nga ang pag-alokar sang pondo sa tagsa ka opisina magadepende sa ila budget utilization kag performance sang 2025, lakip ang implementasyon sang mga programa kag proyekto.
Ginalantaw man sang komite ang mga bag-o nga programa nga ginapanugyan sang mga opisina para sa kaayuhan sang mga pumuluyo sa probinsya sang Iloilo.
Dugang pa ni BM Oso, ginalauman nga mapaguwa ang committee report sa masunod nga semana ukon sa masunod pa, nga amo ang mangin basehan sa masunod naman nga deliberasyon kag pagbasa sang proposed budget antes ini maaprubahan sa ikatatlo nga pagbasa.
