Ginpahanumdoman sang Iloilo City Persons with Disability Affairs Office (PDAO) ang mga content creator nga indi paggamiton nga konteksto sang ila social media ang “differently abled” citizens ukon Persons with Disabilities (PWDs).
Sa exclusive interview sang Bombo Radyo kay Eleanor Gregorio, Officer-in-charge sang PDAO, iya ginpahayag dapat gamiton sang mga content creator ang ila mga platform sa pagpalapnag sang maayo nga impormasyon kag paghangop sa sitwasyon sang mga PWD, sa baylo nga mangin kabangdanan sang pagpakanubo sa ila.
Ginpanawagan man niya ang mga ginikanan kag manunudlo nga suguran sa panimalay kag eskwelahan ang pagtudlo sang respeto, agud mahangpan sang mga kabataan nga ang mga tawo nga may disability may pareho man nga kinamatarong nga dapat tahuron.
Suno kay Gregorio, wala pa sila nakabaton sang reklamo may kaangtanan sa bullying ukon pagpangyaguta sa mga PWD apang ang mga reklamo nga naglab-ot sa ila opisina angut sa indi husto nga paghatag sang diskwento.
Ginpunto niya nga indi dapat pagkabigon nga lain ang mga PWD bangud sa ila kondisyon, kundi hatagan sang patas nga pagtratar kag pagtahod suno sa ila kinahanglanon.
Gani, ginahingyo ni Gregorio ang publiko nga mangin kabahin sang pagpalapnag sang awareness agud ang social media mangin instrumento sang paghangop kag pagrespeto, indi plataporma sang pagpangyaguta sa mga PWD.
Text by: Bombo Cyrene A. Nasis
