Ginapasangkad sang Iloilo City Government ang backyard gardening kag urban agriculture kasunod man sa ginalauman nga El Niño.
Ini agud mabuligan ang mga pumuluyo nga makaproduce sang ila kaugalingon nga pagkaon bisan sa ila tagsa ka mga panimalay.
Suno kay City Agriculturist Iñigo Garingalao, halin sang 2020, daku ang kabudlayan sa pag-engganyo sa mga taga-syudad nga magtanom bangud madamo ang naanad nga magpangayo na lamang sang pagkaon sa iban sa baylo nga magpatubo sang ila kaugalingon nga mga utan.
Apang, amat-amat na nga nagabag-o ang panan-aw sang mga pumuluyo sa gardening, gikan sa 12 ka partisipante sang EDISCAPE contest, nagdangat na ini sa 90, samtang ang ginatanoman nga mga duta nga una nagalapaw lamang sa 180 hectares ang nagdaku na sa 254 hectares.
Suno kay Garingalao, isa sa mga rason nga nagadugang ang interes sang mga pumuluyo amo ang paghatag sang mga pamaagi sa pagpanguma nga bagay sa urban setting.
Importante ini bangud ginapaabot nga kung maglala ang El Niño kag maapektuhan ang mga uma sa palibot sang siyudad, mahimo man magsaka ang presyo sang mga utan.
Ginpahayag man ni Garingalao nga ginapalapad sang opisina ang mga training sa backyard gardening, lakip na sa mga subdivision nga nagapangayo sang dugang nga impormasyon.
Nagpatigayon man ang City Agriculturist Office sang training para sa mga kapulisan bilang kabahin sang livelihood program sa Project AMLIG, agud mapuslan ang mga bakante nga espasyo kag mahimo ini nga tanoman.
Nahibaluan nga kabahin man sang pagpanghanda sa El Niño ang pagtudlo sa mga mangunguma kung ano nga mga binhi ang mas makasarang sa nagataas nga temperatura.
Gina-engganyo man ang mga mangunguma nga magsugod na sa pagtipon sang tubig antes pa maglala ang init.
Dugang pa diri, ginapadayon sang opisina ang pagtipon sang mga materyales para sa backyard gardening, lakip ang mga plastic container nga mahimo tanuman.
Ang Iloilo City Agricultural Nursery nagahatag man sang mga binhi kag carbonized rice hull sa mga pumuluyo nga nagakinahanglan sini.
Text by: Bombo Cyrene Nacis
