Naghimo sang kasaysayan ang rising OPM star nga si Mariah Deborah matapos mangin una nga babaye nga OPM artist nga nakasulod sa Billboard Global Excl. U.S. chart paagi sa iya hit song nga “Na Para Bang.”
Suno sa report sang Billboard Philippines, nag-debut ang kanta sa ika-106 nga pwesto sang nasambit nga chart sa listahan nga may petsa nga Oktubre 24, 2026.
Nagdugang na ang “Na Para Bang” sa iban pa nga mga OPM song nga nakasulod sa international chart, lakip ang “Multo” sang Cup of Joe nga nag-debut sa No. 74 sang 2025, “Tibok” ni Earl Agustin sa No. 144 sang 2025, kag “Ere” ni Juan Karlos sa No. 138 sang 2023.
Suno sa Billboard Philippines, gina-rank ang mga kanta sa Billboard Global Excl. U.S. sandig sa kadamuon sang streaming kag digital sales halin sa masobra 200 ka teritoryo sa kalibutan base sa datos nga ginatipon sang Luminate.
Dugang pa diri, nagpanguna man ang “Na Para Bang” sa Billboard Philippines Hot 100 kag Top Philippine Songs charts para sa Oktubre 24. Nangin number one man ini sa Spotify Top 50 Philippines.
Ginpagwa ang “Na Para Bang” sang Pebrero.
Lakip man sa iban nga mga kanta ni Mariah Deborah ang “Hibang” kag “Bahagya.”
