Pilason ang 11 ka mga indibidwal sa natabo nga aksidente sa Barangay Sto.Tomas, Passi City.
Sa interview sang Bombo Radyo kay Police Lieutenant Colonel Peter John D. Pisueña ang hepe sang Passi City Police Station, iya ginpahayag nga duha ka tricycle ang nagbungguanay, kun sa diin ang isa ka tricycle ang nagagamit sang trapal tungod sa mabaskog nga ulan sa area, rason nga wala niya nakita nga nagalapaw na ini sa pihak nga linya sang karsada kag nabungguan ang nagapadulong nga tricycle.
Dugang ni Pisuena nga gilayon man nga gindala sa hospital ang mga biktima nga nakaagom sang minor injuries kag sa subong tanan sila ang outpatient na.
Ginpahayag nga ang isa ka tricycle ang may anom ka sakay, kun sa diin kaupod sang driver ang iya pamilya.
Sa pihak nga tricycle naman, lima ang sakay kun sa diin kaupod sang driver ang iya asawa kag tatlo ka kabataan.
Sa subong, nadesisyunan nga wala na sang mapasaka sang kaso tungod sa ang duha ka bahin ang magparyentehanay lang.
Text by: Bombo Ireca Pioquinto
