Nagpahayag sang pagkadismaya ang United Labor-Panay sa ₱40 nga pagsaka sang inadlaw nga minimum nga sweldo sang mga mamumugon sa non-agricultural nga sektor kag ₱45 naman sa agricultural nga sektor sa Western Visayas.
Sa opisyal nga pahayag, ginpahayag sang grupo nga kulang ang nasambit nga pagsaka sang sweldo agud matabunan ang nagapadayon nga pagsaka sang presyo sang mga kinahanglanon, ilabi na nga suno sa ila, naglab-ot sa 9.2 porsyento ang inflation rate sa Western Visayas.
Suno sa United Labor-Panay, wala nagasanto ang kantidad sang wage increase sa nagataas nga presyo sang mga nagapanguna nga kinahanglanon sang mga pamilya, gani nagapabilin nga mabudlay para sa madamo nga mamumugon ang pagsustenir sa ila adlaw-adlaw nga panginahanglan.
Apang, ginakilala sang grupo nga ang pagpasaka sang sweldo ang bunga sang kolektibo nga pagtimakas kag panawagan sang mga mamumugon nga ginpamatian sang gobyerno.
Apisar sini, ginpahayag sang United Labor-Panay nga dapat padayunon ang pagpanawagan sang mas mataas nga sweldo, seguridad sa trabaho, suporta para sa mga magagmay nga negosyo, kag dignidad para sa tanan nga mamumugon.
Dugang pa sang grupo, indi dapat mangin temporaryo lamang nga sabat sa krisis ang bulig para sa mga mamumugon, kundi kinahanglan ang desente nga sweldo nga makasustenir sa panginahanglan sang ila mga pamilya.
