Nag-umpisa na ang Iloilo Provincial Hospital Management Office sa pag-imbestiga sa ginaalegar pigado nga hospital service sa Rep. Pedro Trono Memorial Hospital sa Guimbal, Iloilo.
Ini kasunod sang reklamo sang pamilya sang pasyente nga ginapahayag ginbalibaran nga ma-admit sa ospital.
Sa interview sang Bombo Radyo kay Atty. Yoko Marie Eguia, Head sang Iloilo Provincial Hospital Management Office, iya ginpahayag nga nag-coordinate na sila sa hospital chief agud makakuha sang impormasyon, ma-review ang insidente kag makakuha man sang reports halin sa mga involved nga personnel.
Suno sa iya, ang imbestigasyon yara pa lang sa information-gathering stage sa diin kinahanglan nga ma-establisar ang kamatuoran kag mahatagan sang due process ang mga staff sang ospital.
Apang kun may yara gid man sang kapaltahan nga matukiban sa imbestigasyon, i-refer ini kay Gov. Arthur Defensor Jr. para sa fact-finding kag posible formal investigation.
Gin-athag ni Eguia nga nagakadapat gid nga makabaton sang insakto nga medical care ang mga pasyente sa idalom sang no-refusal policy sang ospital.
Nagpasalig man ang natungdan nga lab-uton nila ang pamilya sang pasyente agud makahinun-anon tuhoy sa ila concerns kag madetermina ang mga kinahanglan pa nga ma-improve nga serbisyo sang ospital.
By: Bombo Lynd-C Bade
